Det er ikkje uvanleg at barn mistar oldeforeldre eller besteforeldre medan dei framleis er barn, eller dei opplever at eit kjæledyr dør. Samtidig er det lite som sikrar at barn får god informasjon om kva som skjer når nokon dør, og kva som er vanleg etter at nokon dør. Døden er heller ikkje eit tema som kjem opp i noko kompetansemål.

Kanskje ikkje minst difor har vi valt å lage ein film om dette, og denne timen der barn får jobbe med dette temaet. Det å få eit språk for kva som skjer, og betre forståing for kva som skjer i etterkant, og kunnskap om ulike måtar å sørge på, kan vere nyttig i elevane si livsmeistring.

Vi har laga nokre forslag til korleis de kan bruke ein bamse som utgangspunkt for teikning, leik eller rollespel om døden. Ved å bruke ein konkret figur får barn leike ut tankar og idear om eit vanskeleg tema, utan at dei treng å trekke det heilt ned til eige liv og realitet. Det blir ein tryggare mellomstasjon for å lære om eit sårbart tema, utan at det blir for reelt. Barn kan ha stor nytte av leik som bearbeiding av tankar og følelsar.

Dersom du har elevar i di klasse som nyleg har erfart å miste nokon, bør du snakke med dei på førehand og informere om kva timen skal handle om. I filmen vektlegg vi at det stort sett er gamle folk som skal døy, og at det ikkje er slik at barn treng å bekymre seg for at unge skal døy. Samtidig veit vi jo at det også skjer. Og du kan ha elevar i di klasse som har foreldre som har døydd, eller som er alvorleg sjuke. Då bør du snakke med desse på førehand. Det kan då også nemnast i klassa, men med fokus på det å bli tatt vare på sjølv om slike ting skjer.

Som heimeoppgåve kan elevane godt snakke med eit familiemedlem, mamma/pappa/besteforelder om det å miste nokon ein er glad i. Forslag til intervjuspørsmål/ samtalepunkt kan vere:

• Kva slags følelsar fekk du når personen døydde? Korleis sørga du?
• Viss du framleis er lei deg, er dette annleis no enn det var med ein gang?
• Kan du fortelje eit fint og kanskje litt morosamt minne du har om deg og personen som døydde?

Det du må ta med til denne timen:

• Instruksjon for lærar - Familie 3. trinn (PDF, 160 kB)
• eventuelt ein bamse dersom de vil bruke ein av bamseaktivitetane.

Husk å lese Familie - for vaksne og sende lenke heim, slik at heimane også får bidra i temaet.

Dette temaet kan vere med på gi opplæring innanfor kompetansemåla om at eleven skal kunne:

• beskrive og samtale om ulike måter å leve sammen på i familie og samfunn (KRLE).
• identifisere og reflektere over etiske spørsmål (KRLE).
• sette seg inn i og formidle egne og andres tanker, følelser og erfaringer (KRLE).
• følge opp innspill fra andre i faglige samtaler og stille oppklarende og utdypende spørsmål (norsk).
• beskrive, fortelle og argumentere muntlig og skriftlig og bruke språket på kreative måter (norsk).
• reflektere over hvordan språkbruken vår påvirker andre, og hvordan vi tilpasser og endrer språket i ulike situasjoner (norsk).