Dette temaet kan gi opplæring innan kompetansemål der eleven skal kunne:

• utforske ulike plattformer for digital samhandling og reflektere over korleis digital deltaking og samhandling påverkar forma på og innhaldet i samfunnsdebatten (samfunnsfag).
• reflektere over korleis identitet, sjølvbilete og eigne grenser blir utvikla og utfordra i ulike fellesskap, og presentere forslag til korleis ein kan handtere påverknad og uønskte hendingar (samfunnsfag).
• beskrive sentrale lover, reglar og normer og drøfte kva konsekvensar brot på desse kan ha for den enkelte og for samfunnet på kort og lang sikt (samfunnsfag).
• utforske og reflektere over eigne digitale spor og høvet til å få sletta spora og å verne om retten ein sjølv og andre har til privatliv, personvern og opphavsrett (samfunnsfag).
• identifisere og drøfte etiske problemstillinger knyttet til ulike former for kommunikasjon (KRLE).
• utforske og vurdere hvordan digitale medier påvirker og endrer språk og kommunikasjon (norsk).
• reflektere over korleis ulike framstillingar av kropp i media og samfunnet påverkar bevegelsesaktivitet, kroppsidentitet og sjølvbilete (kroppsøving).

I denne timen har vi valt å fokusere på normativ konformitet. Dette er nok eit framand ord for elevane, men ved å lære ordet vert dei også medvitne nokre av dei mekanismane dei er utsette for i kvardagen.

Det er fint om elevane rekk å jobbe litt med eksperimentet, men om de har lite tid er det nok at dei rekk å snakke laust om spørsmåla. Berre det vil gi meir merksemd på korleis sosiale media påverkar dei på godt og vondt.

Det du skal ha med til denne timen er:

• Instruksjonar for lærar - Nettet 10. trinn NN (PDF, 336 kB) eller 
• Instruksjoner for lærer - Nettet 10. trinn BM (PDF, 360 kB)
• Eventuelt blanke ark som elevane kan skrive på i oppgåva

Sjå gjerne filmen under:

Som foreldre skal det noko til å greie å henge med i utviklinga på alt som foregår på nett. Ungdomane våre som brukar fleire timar kvar dag på sosiale media, vert påverka mykje meir enn dei trur, og det er vanskeleg for oss å fange opp og følgje med alt vi kanskje burde. I denne timen lærer elevane om normativ konformitet. Altså om korleis vi gjennom sosiale media vert påverka til å meine og gjere ting som framstår sosialt akseptert, men som vi kanskje elles aldri ville meint eller gjort. Til dømes kan det verke underleg for oss vaksne at ungdommar tek sjansen på å dele lettkledde bilde, eller filmar som viser valdshandlingar. Nokre av bilda og filmane dei deler er lovstridig å dele, dei gjer ei kriminell handling. Likevel kan dei oppleve at det er sosialt akseptert, og vanleg, å gjere dette. Difor vert dei med på det utan å tenke seg så mykje om. Dette får store uforutsette konsekvensar for mange.

Når vi skal snakke med ungdommane våre om dette, for det bør vi gjere, er det viktig å forstå at dei opplever å vere innanfor det som er sosialt akseptert, normalt, i deira gruppe. Då kan det kjennest vanskeleg å ta andre val. Vi kan forstå og validere følelsen av å ville gjere det andre gjer og forventar av deg. Det er ikkje rart at ungdom høyrer meir på kvarandre enn på oss vaksne. Vi kan validere denne følelsen utan å seie at det er greitt å gjere dei handlingane følelsen kan føre til. Det er ikkje greitt å dele bilde eller filmar av andre. Spesielt ikkje bilde eller filmar som viser barn under 18 på ein seksualisert måte eller som viser valdshendingar. Det er viktig at ungdomane veit at det er kriminelt å gjere dette, og i tillegg er etisk ugreitt.

Sjølv når ungdom har gjort noko dei ikkje bør på nett, er det fint om du greier å møte dei med forståelse for at dette kan skje, og samtale om korleis de unngår at det skjer igjen. Ungdom kan trenge hjelp til å klare å ta gode val, men dei treng fortsatt skjermane sine og nett-tilgang. Om ungdomane opplever å bli møtt med sanksjonar som å miste nett-tilgang eller mobil, kjem dei ikkje til å fortelje deg det som skjer med dei. Det er dumt, både for deg og ungdommen din. Sjølv om du blir skremd og kjenner deg maktelaus i møte med det som skjer på nett, er det beste du kan gjere å lytte, prøve å forstå, og vise at du gjerne vil hjelpe.

Sjå gjerne filmen under:

Mykje av det sosiale livet til ungdommen skjer via sosiale media og på ulike kanalar. Vi ser at denne måten å kommunisere på er viktig og sentral for dei unge. Mobilen er gjerne med overalt, helst 24/7. Det er sjølvsagt på godt og vondt.  

I møte/samtaler med dei unge vil vi gi dei kunnskap om nettvett slik dei kan ta gode val for seg sjølv. Det kan vere bruken og nytten, det som blir kommunisert ut og det som skal takast i mot. Den unge kan kjenne på at livet på nett også skal meistrast. Det hender fleire gonger at helsesjukepleiar blir involvert i saker/hendingar som har med ugreie ting via sosiale media å gjere, som deling av bilde og ulike krenkingar. I slike saker må ofte fleire bli involvert og helsesjukepleiar har fleire å samarbeide med her. 

Nettet er også ein arena der ungdom kan prøve ut sin (gryande) seksualitet. Dei finn fram til porno, dei får tilsendt nakenbilde, og dei blir bedt om å sende bilde av seg sjølve der dei framstiller eigen kropp seksuelt. På ulike sosiale media dukkar det opp nye trendar og utfordringar til dei unge, mykje før vi vaksne klarer å fange det opp og forhindre dei frå å delta. Mange slike trendar og utfordringar kan vere farlege for ungdommane. Ofte er vi helsesjukepleiarane av dei første som får vite slikt, fordi elevar kjem og fortel om det. Det blir opplevd som skummelt, ekkelt, flaut eller vanskeleg. Helsesjukepleiar møter ungdommen med samtale om kva dei har opplevd, og prat om kva som er lurt å gjere vidare.

Heime er mange redd dei vil bli møtt med grenser og sanksjonar som inndraging av telefon og redusert nett-tilgang. Også i slike samtalar må helsesjukepleiarane heile tida vurdere i kva grad vi kan ha teieplikt om det ungdommane fortel, eller om vi må informere heim og skole for å ivareta ungdommen sin tryggheit. Noko av det elevar fortel om er kriminelle handlingar og då må vi også informere politiet. 

Helsesjukepleiar er opptatt av helse og at den unge skal lære seg å ta meir ansvar for eiga helse. Ofte ser vi at nettbruk/sosiale media/chat med venner eller ulike spel og tv-seriar tek tid av ungdommen sin dag og gjerne søvn. Mange unge får for lite søvn. Helsesjukepleiar spør ofte den unge om søvnvaner. Om det blir nok søvn og om den unge er opplagt til det den skal møte i løpet av ein dag. Det er nødvendig å vere opplagt og utkvilt til skolekvardagen, likeså å vere til stades i relasjonar i møte med andre, samt det å ta gode val. Vi ser igjen at tankar, følelsar, søvn, åtferd og handlingar påverkar kvarandre. 

Vi skal ikkje gløyme at gode vennskap også kan bli til over nett. Mange ungdommar møter andre unge i Norge og ute i den store verda gjennom online spill og ulike chattekanalar/interesse. Målet med å snakke om nettbruk er å gjere ungdommen i stand til å ferdast klokt på nettet, og vere våken for ulike faresignal som kan dukke opp.