Korleis legge merke til og stoppe mobbing?
Mobbing er eit stort og vondt problem for dei barna det går ut over, og det er først og fremst vaksne sitt ansvar å sørge for at ingen blir mobba. Det skal vi vaksne gjere ved å passe på at alle elevar kjenner kvarandre godt, og at vi har eit trygt og godt miljø saman på skulen. Likevel er det ikkje alltid vi vaksne ser, eller er der, når mobbing skjer, derfor kan det vere lurt å trene litt på dette.
Når er dette nyttig å kunne?
Det er ofte tilfeldig kven som blir plaga og kven som blir med på plaging. Derfor er mange barn redde for at dei sjølve kan bli dei neste som blir plaga når dei ser at nokon blir det. Mange blir ståande å ikkje gjere noko, og det er veldig dumt. Derfor kan alle trenge å legge merke til når nokon blir plaga og saman stå opp for kvarandre på ein fin måte som får det til å bli slutt på mobbing.
-
Legg merke til om nokon blir mobba eller plaga
-
Legg merke til kva følelsar det gir deg (sint – redd – trist – skam – skyld - ) Det er heilt forståeleg at du kjenner det slik!
-
Vil du «passivt støtte» den som mobbar ved å vere stille, eller vil du støtte den som blir plaga med å gjere noko?
-
Klarer du å sei eller gjere noko aleine, eller får du med deg fleire, eller vil du hente ein vaksen?
-
Sei «Slutt å mobb!» «Slutt opp det er ikkje gøy!» «Hadde du sagt sånn til meg hadde eg blitt lei meg!»
Rollespel: bli med sjølv i spelet enten ved at å spele at du er den som plager, eller at du er den som blir plaga. Dersom elevar skal spele plaging så sørg for at den som skal spele offer er ein «populær» elev som ikkje sjølv opplever mobbing til vanleg. Gi klassa i rolle å vere barn som er i nærleiken og ser kva som skjer, utan å vere med i mobbinga.
Spør klassa: kva kan de som ser på dette gjere? Korleis kan de stoppe det som skjer?
La dei først kome med forslag, og så kan nokre kome fram og prøve. Be andre legge merke til kva dei gjer bra. Spør den som blir plaga – og den som plagar – korleis dette kjennes.
Følg opp over tid med å spørje om nokon har fått bruk for å kunne dette, og korleis det gjekk, og unngå at dei nemner namn på kven som har blitt plaga/kven som plaga andre.
- La elevane prøve å kome på setningar dei kan sei til dei som plager som set grenser for plaginga, men samtidig er omsorgsfulle over for dei som plagar.